काठमाडौँ : ओखलढुङ्गामा भएको ‘खिजीदेम्बा ४२ किमी अल्ट्रा ट्रेल रेस प्रतियोगिता’को उपाधि पुरुषतर्फ करण रावल र महिलातर्फ प्रिया राईले जितेका छन् ।
यस्तै स्थानीय इभेन्ट पुरुषतर्फ पृथीलाल राई र महिलातर्फ पदमकुमारी सुनुवारले उपाधि चुमेका छन् ।
खिजिदेम्बा गाउँपालिकाको आयोजना, ओखलढुंगा पर्यटन विकास समितिको सहआयोजना र नेपाल पर्यटन बोर्डको प्रायोजनमा भएको उक्त प्रतियोगितामा ६० जना खेलाडीहरुको सहभागिता रहेको थियो ।
प्रतियोगिताको राष्ट्रिय इभेन्ट पुरुषतर्फ करण रावल पहिलो, राजन मेयोङ्बा दोस्रो र रमेश लिम्बुले तेस्रो स्थान हासिल गरेका छन् । यस्तै महिलातर्फ प्रिया राई पहिलो, निर्मला राई दोस्रो र हुमी बुढामगर तेस्रो भएका छन् । छोकी शेर्पाले चौथो स्थान प्राप्त गरिन् ।
स्थानीय इभेन्टअन्तरगत पुरुषतर्फ पृथीलाल राई प्रथम, देवराज सनुवार दोस्रो र धनबहादुर तामाङले तेस्रो स्थान हासिल गरेका छन् । यस्तै स्थानीय इभेन्ट महिलातर्फ पदमकुमारी सुनुवार पहिलो, हिरुमायाँ भुजेल दोस्रो र अनिता सुनुवारले तेस्रो स्थान हासिल गरेका छन् ।
उक्त प्रतियोगितामा महिला र पुरुष राष्ट्रिय इभेन्टमा पहिलो, दोस्रो, तेस्रो र चौथो हुनेलाई क्रमशः ७० हजार, ६० हजार, ५० हजार र २५ हजार पुरस्कार प्रदान गरिएको छ ।
स्थानीय इभेन्टमा पहिलो, दोस्रो र तेस्रो हुनेलाई क्रमशः २०, १५ र १० हजार पुरस्कार प्रदान गरिएको आयोजकले जनाएको छ ।
