काठमाडौँ । नयाँ वर्ष २०८१ सालको स्वागत गर्न देशका प्रमुख पर्यटकीय स्थलहरुमा आन्तरिक र बाह्य पर्यटकहरुको घुँइचो लागेको छ ।
पुरानो वर्ष वि.सं.२०८० लाई विदाई गर्दै वि.सं.२०८१ लाई हौसलापूर्वक स्वागत गर्न आन्तरिक तथा बाह्य पर्यटक आतुर देखिन्छन् ।
काठमाडौँ, पोखरा र सौराहा लगायतका देशका विभिन्न स्थानको पर्यटकीय क्षेत्रमा पर्यटकको आगमनले रमणीय देखिएको छ ।
पुराना वर्षहरुमा देखिएको आर्थिक निराशालाई नयाँ वर्षको उल्लासमय पर्यटकको उपस्थितिले चिर्ने आशा पर्यटन व्यवसायीमा पलाएको छ ।
काठमाडौँमा कहाँ के छ ?
देशकै पहिलो पर्यटकीय गन्तब्य राजधानी काठमाडौँमा पर्यटकको आवागमन बढी हुने स्थलहरुमा बिहानैदेखि झकिझकाउ पारिएका छन् । आजदेखि नै लागुहुनेगरी प्रमुख पर्यटकीय स्थलहरु २४ घण्टा नै खुला रहने घोषणा गरिएपछि पर्यटन व्यवसायीहरुमा थप खुशी छाएको छ ।
काठमाडौँको ठमेल, दरबारमार्ग, बसन्तपुर दरबार क्षेत्रमा यो वर्षको अन्तिम राती अबेरसम्म ठेलमठेलयुक्त आन्तरिक तथा बाह््य पर्यटक ओइरिए । किनमेल, खनपिन र घुमिफिरसँगै नयाँ वर्षको स्वागत गर्न स्थानीयहरु पनि आतुर देखिए ।
प्रमुख गन्तब्यका रुपमा ठमेललाई दुलही झैँ सिंगारिएको छ । उल्लासमय वातावरण देखेर पर्यटकरु फोटो खिचाउन र नयाँ वर्ष मनाउन उत्सुक देखिएका छन् । त्यहाँको होटलहरु नयाँ वर्ष मनाउनकै लागि भरिभराउ भएका छन् । नयाँ वर्षको आगमनले पर्यटनका लागि राम्रो वातावरण सिर्जना गरेको पर्यटन व्यवसायी अरण सिलवालले बताए ।
काठमाडौँ उपत्यकाभित्रका भक्तपुर र ललितपुर क्षेत्रमा प्रमुख पर्यटकीय स्थलहरुमा पनि उत्तिकै चलहपहल बढेको छ । भक्तपुर दरबार क्षेत्र, नगरकोट क्षेत्रमा आन्तरिक र बाह्य पर्यटकको उपस्थिति राम्रो रहेको छ । काठमाडौँबाट धुलिखेलमा नयाँ वर्ष मनाउनेको चाप पनि उत्तिकै रहेको पर्यटन व्यवसायीहरुले बताएका छन् ।
पोखराको लेकसाईड भरीभराउ
देशको दोस्रो सुन्दर पर्यटकीय नगरी पोखरामा पनि नयाँ वर्षको स्वागत गर्न पर्यटकको ठूलो भिड छ ।
पोखराको फेवा तालमा यो वर्र्षको अन्तिम डुंगा चढ्न र सूर्यास्त हेर्नेको आज साँझ अत्यधिक भिड लाग्यो । सराङकोट, जोमसोमलगायतका क्षेत्रमा गएर नयाँ वर्ष मनाउनेको लर्को बिहानैदेखि राम्रो देखिएको त्यहाँका पर्यटन व्यवसायीहरुले जानकारी दिएका छन् ।
सौराहामा पर्यटक खचाखच
सुन्दर प्राकृतिक छटाहरुले भरिपूर्ण तेस्रो पर्यटकीय गन्तब्य सौराहा आन्तरिक र बाह््य पर्यटकले खचाखच भरिएको छ ।
यो वर्ष अस्ताउदो सूर्यको दृष्यावलोकन राप्ती नदीमा हेर्नकै लागि आज साँझ पर्यटकको घुईँचो राप्ती किनारमा लाग्यो ।
अत्यधिक पर्यटक बढेकाले नयाँ वर्षको आगमनसँगै पर्यटनको माहोल बदलिने विश्वास सौराहाका व्यवसायीले विश्वास व्यक्त गरेका छन् ।
पर्यटन व्यवसायी शिरलाल परियारले भने, पर्यटकको संख्या राम्रो देखिएको छ , विगतको निराशा नयाँ वर्षले फेरिने आशा पलाएको छ ।
यो वर्ष पर्याटनमा रमाउने महिलाहरुको सङ्ख्या पनि तुलनात्मक रुपमा बढेको पर्यटन व्यवसायी शुशिला चौधरीले जानकारी दिइन् । स्वदेशी र विदेशी महिलाहरु आफ्ना साथी तथा समुहका साथमा नयाँ वर्ष मनाउन सौराहा पुगेका छन् ।
सामुदायिक वनहरुमा हात्ती चढ्नेको लर्को आज बिहानदेखि साँझसम्म राम्रो रहेको अर्का पर्यटन व्यवसायी जीत बहादुर तामाङले बताए । हात्ती चढ्ने धेरै भएपछि हात्ती माहुते र हात्तीलाईसमेत भ्याइनभ्याइ भएको छ ।
सौराहा क्षेत्र चोकहरु झिलिमिलि पारेर सजाइएका छन् । चोकहरुमा नयाँ वर्षको उत्सव मनाउन विभिन्न कार्यक्रमहरुको आयोजना गरेर पर्यटकलाई खुशी प्रदान गर्न पर्यटन व्यवसायीहरुले कुनै कन्जुस्याँइ गरेका छैनन् ।
स्थानीय थारु समुदायले पर्यटक रिझाउन समुहरुमा विभाजित भएर आफ्ना कला संस्कृतिको प्रदर्शनी गरेका छन् । लाठी नाँच, झिझियाँ नाँचमा पर्यटक लोभिएका छन् ।
सौराहाहुँदै चितवन राष्ट्रिय निकुञ्जको पैदल तथा जीप सफारी गर्नेको लर्को पनि राम्रो रहेको छ ।
त्यस्तै निकुञ्जभित्र लागेको बिक्रमबाबाा मेलामा रमाउने पर्यटकको सङ्ख्या पनि उच्च रहेको चितवन राष्ट्रिय निकुञ्जका प्रमुख संरक्षण अधिकृत डिलबहादुर पुर्जाले बताए । त्यसैगरी नारायणगढको नारायणी किनारमा नयाँ वर्ष मनाउने राम्रो उपस्थिति रहेको छ ।
कतिपय पर्यटकहरु हिमाली पर्यटनमा रमाउनका लागि केही दिन अघि नै मर्दी, सगरमाथा बेसक्याम्प, रारा क्षेत्रतिर लागेका छन् ।
