काठमाडौँ : फिफा विश्वकप २०२६ र एशियन कप २०२७ को संयुक्त छनोटअन्तर्गत दोस्रो चरणमा युएई र यमनविरुद्धको खेल खेल्ने नेपाली राष्ट्रिय फुटबल टोलीलाई आज बिदाइ गरिएको छ।
आइतवार काठमाडौंमा एक कार्यक्रमबीच टोलीको बिदाइ गरिएको हो। खेलाडीलाई अखिल नेपाल फुटबल संघ (एन्फ) मा अध्यक्ष पंकजविक्रम नेम्वाङ, महासचिव किरण राई, सिईओ इन्द्रमान तुलाधर लगायतले आइतबार टोलीलाई बिदाइ गरे। नेपाली टोली २३ खेलाडी र ११ जना अफिसियल गरी ३४ सदस्यीय रहेको छ।
२३ सदस्यीय नेपाली फुटबल टोलीमा गोलकिपरमा किरण चेम्जोङ, अभिषेक बराल, विशाल सुनार, रक्षकमा अनन्त तामाङ, अभिषेक लिम्बु, विमल पाण्डे, विशाल बस्नेत, छिरिङ लामा, रोहित चन्द, सनिश श्रेष्ठ, सौभाग्य राई र मिडफिल्डरमा भरत खवास, लकेन लिम्बू, मनीष डाँगी, वसन्त जिम्बा, सुमित श्रेष्ठ, मणिकुमार लामा, आशिष राई र फरवार्डः जिलेस्पेजंग कार्की, हिसुब थपलिया, आशिकबाबु चौधरी, सञ्जीव विष्ट, आयुष घलान रहेका छन्।
दोस्रो चरणमा समूह ‘एच’मा रहेको नेपालले अन्तिम दुई खेल साउदी अरेबियाको दमाममा खेल्नेछ। नेपालले युएईविरुद्ध जुन ६ र यमनविरुद्ध जुन ११ मा खेल्दै छ। दुवै खेल दमामको प्रिन्स मोहम्मद बिन फहद स्टेडियममा हुँदै छ।
नेपाल र युएईविरुद्धको खेल घरेलु मैदानमा खेल्नुपर्ने थियो तर दशरथ रंगशालाको मैदान खेलाउन लायक नभएपछि साउदी अरबमा खेल्न लागेको हो।
