काठमाडाँ : उपप्रधानमन्त्री एवं गृहमन्त्री रवि लामिछानेले आफ्नो बारेमा पनि अनुसन्धान अघि बढाउन आग्रह गर्नुभएको छ ।
गृह मन्त्रालयमा आज भएको बिदाई कार्यक्रमलाई सम्बोधन गर्दै उहाँले भन्नुभयो, “आजसम्म स्वतः प्रभावित हुनुभएको भए पनि अब मेराबारे पनि अनुसन्धान गर्नुस् । गलत गरेको भए कानून मलाई पनि लाग्नुपर्छ ।”
नक्कली भुटानी शरणार्थी, टीकापुर, पतञ्जली र बालमन्दिर जग्गा प्रकरणबारे जारी अनुसन्धान निष्पक्ष र प्रभावकारी रुपमा अगाडि बढोस् भन्ने आफ्नो चाहना रहेको उहाँले बताउनुभयो ।
सरकार परिवर्तन अनौठो कुरा नभएको उल्लेख गर्नुहुँदै गृहमन्त्री लामिछानेले तर सरकार परिवर्तनको प्रभाव प्रहरी र कर्मचारी प्रशासनमा पर्न नहुने र नपार्ने प्रयास गर्न गृह र सुरक्षा अधिकारीहरुसँग आग्रह गर्नुभयो ।
अनुसन्धान जारी रहेका कारण सुन काण्ड छानबिनको प्रतिवेदन सार्वजनिक नगरेको पनि उहाँले जानकारी दिनुभयो । उहाँले थप्नुभयो,“ हामीलाई लागेको होला केके नै गर्यौं तर, हाम्रा कामबाट नागरिक पटक्कै खुसी छैनन् । नागरिक सन्तुष्ट नभएसम्म हामीले कामको प्रगति विवरण भनेर बुँदाहरु थप्दै सार्वजनिक गर्नुको के अर्थ ?”
सरकार परिवर्तन हुनुको, मन्त्री आउनु र जानुको प्रभाव नागरिकलाई पर्नु हुँदैन। म जानु र अर्को मन्त्री आउनुमा तपाईंहरुले खासै परिवर्तन महसुस गर्नु पर्दैन। कानूनअनुसार काम गर्न मन्त्री परिवर्तनले के फरक पार्छ र?
चार महिनामा धेरै काम गर्न नसकिएको तर, केही आधार तयार भएको पनि उहाँले बताउनुभयो ।
गृहमन्त्री लामिछानेले तयार भएको आधारलाई भत्किन नदिनु अनुरोध गर्दै नयाँ मन्त्रीले पनि बनेको आधारलाई सकारात्मक रुपमा ग्रहण गर्ने विश्वास व्यक्त गर्नुभयो ।
