काठमाडौँ : काठमाडौँबाट पोखरातर्फ जान लाग्दा सौर्य एयरको जहाज आज त्रिभुवन अन्तर्राष्ट्रिय विमानस्थलमा दुर्घटना भएको छ। सौर्य एयरलाइन्सका अनुसार मर्मतका लागि पोखरा जान लागेको जहाज दुर्घटनामा परेको हो।
नेपाल नागरिक उड्डयन प्राधिकरण (क्यान)ले उक्त दुर्घटनामा परी १८ जनाको शव निकालिएको पुष्टि गरेको छ। क्यानले जारी गरेको विज्ञप्तिमा भनिएको छ, ‘बुधबारका दिन सौर्य एयरलाइन्स जहाज काठमाडौंबाट स्थानीय समय अनुसार बिहान ११ : ११ मा पोखरा उडानको क्रममा उड्नेबित्तिकै दाहिनेतिर मोडिन गई रनवेको पूर्वतिर रहेको स्थानमा दुर्घटनाग्रस्त हुन पुगेकोमा तत्कालै उद्धार कार्य शुरु गरी आगो नियन्त्रणमा लिई १८ जनाको शव संकलन गरिएको तथा १ जना घाइतेलाई उद्धार गरि अस्पताल पुऱ्याइको जानकारी गराइन्छ।’
पोखरा जानका लागि विमानमा एयरलाइन्सका कर्मचारी र चालक दलका सदस्य रहेको पाइएको छ ।
