काठमाडौँ : काठमाडौँको बल्खु पुल मुनि आज विहान एक व्यक्तिको शव फेला परेको छ ।
अन्दाजी विहान ७ : ३० बजेको समयमा पुलमुनि अड्किएको अवस्थामा बाँके घर भई काठमाडौँको सुकुम्बासी टोल बस्ने वर्ष ४५ का राम सरुप महतोको शव अड्किएको अवस्थामा फेला परेको काठमाडौँ उपत्यका प्रहरी कार्यालयका प्रवक्ता, प्रहरी वरिष्ठ उपरीक्षक दिनेशराज मैनालीले जानकारी दिनुभयो ।
शवको अहिले मुचुल्का उठाउने काम भएको र परिवार सम्पर्कमा आएकाले उनीहरुलाई शव बुझाउने तयारी गरिएको प्रहरीले जनाएको छ । उनलाई खोलाले बगाएको आशंका गरिएको छ ।
गएराति काठमाडौँ उपत्यकामा भारी वर्षा हुँदा तीनवटै जिल्ला प्रभावित हुन पुगेको छ।
राती ११ बजेदेखि काठमाडौँ उपत्यकाको धेरै स्थानमा भारी वर्षा भएको र बागमती र यसका सहायक नदीहरू हनुमन्ते, मनोहरा, धोविखोला, गोदावरी ,विष्णुमती, नख्खु, बल्खुखोला लगायत सबैमा जलसतह सतर्कता तहदेखि खतरा तह पार गरेको थियो ।
खोलाको बाढी किनारको सडकसम्म आएको र कतिपय बस्तीमा डुवानसमेत भएको मैनालीले जानकारी दिनुभयो । अहिले भने वर्षा हटेको छ ।
