काठमाडौँ : जीवनका विभिन्न आयामहरूलाई सकारात्मक दृष्टिकोणबाट प्रस्तुत गरिएको पूर्वसचिव कृष्णहरि बास्कोटाको नयाँ पुस्तक ‘खुसीको गोरेटो’माथि आज काठमाडौँमा अन्तरसम्बाद गरिएको छ ।

सकारात्मक सोच, विनयशील, नैतिकता, चरित्रवान्, मन सफा जस्ता विषयलाई व्यवहारिक रूपमा प्रयोग गर्न प्रेरित गरिएको उक्त पुस्तक काठमाडौँमा आज एक समारोहका बीच लोकापर्णपछि आयोजित अन्तरसम्वादमा पूर्वमुख्यसचिव एवं साहित्यकार डा. विमल कोइरालाले खुसीको गोरेटो पहिल्याउन सक्नु जीवनको महत्वपूर्ण पाटो भएको बताउनुभयो ।
डा कोइरालाले सँगसँगै सरकारी जागिरे भएर काम गर्दा बास्कोटा कुनै पनि जिम्मेवारी दिँदा कहिल्यै गर्दिन र सक्दिन भनेर पन्छिने व्यक्ति नभएको स्मरण गर्दै त्यही कार्यसम्पादनमा पाएको खुसी पुस्तक बनेर आएको जस्तो आफूलाई महसुस भएको बताउनुभयो ।
मानिसहरु सफल भए पनि खुसी हुन नसकेको आफूले धेरै देखेको प्रसङ्ग जोड्दै डा कोइरालाले भन्नुभयो, “खुसी हुन सकियो भने सफलता प्राप्त हुन्छ तर सफलताले खुसी दिँदैन ।”
उहाँले कोही कर्मचारीहरु सरकारी काम, कहिले जाला घाम भनेर बस्ने, कोही लेख्न जान्ने तर बुझाउन नजान्ने र कोही लेख्न पनि नजान्ने बुझाउन पनि नजान्ने खालको हुने सन्दर्भ जोड्दै लेखक बास्कोटा भने लेख्न र बोल्न र बुझाउन पनि जान्ने कर्मचारीमा पर्ने उल्लेख गर्नुभयो ।
कार्यक्रममा खुसीको गोरेटो पुस्तकमाथि समीक्षा गर्दै जीवन विज्ञानका विशेषज्ञ, जीवन विज्ञान प्रतिष्ठानका संस्थापक एलपी भानु शर्माले विश्वका जुनसुकै पद (राष्ट्रपति, प्रधानमन्त्री मुख्यसचिव) भए पनि मानिसले अन्तिममा खोज्ने भनेको खुसी नै हो भन्दै खुसीमा आनन्द र सुख दुवै समावेश हुने बताउनुभयो ।
उहाँले इमान्दार सोच र पारदर्शीता र अर्काको भलो चिताउनेहरुले नै खुसी प्राप्त गर्ने र यो पुस्तकमा ती कुराहरु समावेश भएको आफूले पाएको बताउनुभयो । सरल र मिठासपूर्ण भाषामा लेखक बास्कोटाले समाजका लागि काम गर्दा आनन्द हुने कुरा उल्लेख गर्नुभएको बताउनुभयो ।



“नेपाल घुम्न र नेपाली तीर्थ गर्न लेखकले पुस्तकबाट आह्वान गर्नुभएको छ, यही हो राष्ट्रियता”, शर्माले भन्नुभयो, “त्यसबाट खुसी प्राप्त हुन्छ ।”
उक्त पुस्तकका अर्का समीक्षक तथा अग्रज पत्रकार वविता बस्नेतले अहिलेको समाजमा नराम्रो कुरा विक्छ भन्ने भाष्य चिर्दै लेखक बास्कोटाले खुसीको गोरेटो पुस्तकमार्फत राम्रो र असल कुरा पनि विक्छ भन्ने देखाउनुभएको बताउनुभयो ।
पुस्तक मानिसको जिन्दगीको वरिपरि घुमेको उल्लेख गर्दै पत्रकार बस्नेतले भन्नुभयो, “खत्तमै भयो, बरबाद नै भयो, केही गर्न सकिएन भनेर निरास हुने मान्छेलाई पनि यो पुस्तक पढेपछि जुरुक्कै उठेर केही गरौँ जस्तो बनाउँछ, त्यसैले सबै खालका मान्छेले पढ्नै पर्ने पुस्तक आएको छ ।”
उहाँले पछिल्लो पुस्तका लागि सकारात्मक सन्देश दिने खालको पुस्तक पूर्वसचिव बास्कोटाले ल्याउनुभएको उल्लेख गर्दै खुसी हुन ठूलो काम वा ठूलो सफलता कुरिरहनु पर्दैन साना कुराहरुले पनि खुसी हुन सकिन्छ भन्ने सन्देशसहितको सकारात्मक भाव यसमा रहेको बताउनुभयो ।
लेखक बास्कोटाले मानिस समयसँगै परिवर्तनशील हुनुपर्ने उल्लेख गर्दै सदा खुसी र सुखी हुनुपर्नेमा जोड दिनुभयो ।
उहाँले आदर चाहिनेले अरुलाई पनि आदर दिन सक्नुपर्ने बताउनुभयो । उहाँले जिन्दगीको सबैभन्दा ठूलो हतियार हिम्मत भएको उल्लेख गर्दै जीवनका अनुभव भोगाइहरु समेटेर पुस्तक तयार गरिएको उल्लेख गर्नुभयो । उहाँले पुस्तकमा २४ खण्डको रहेको बताउनुभयो ।
पुस्तकका लेखक बास्कोटाले मानिस सुखी हुन र खुसी हुन खोज्छ तर पनि दुःखी छ । त्यसैले खुसी हुने कलाका बारेमा पुस्तक लेख्न इच्छा जागेर पुस्तक तयार पारिएको बताउनुभयो ।