काठमाडौँ । काठमाडौँको स्वर्णलक्ष्मी सहकारी ठगी प्रकरणको मुद्दामा आज काठमाडौँ जिल्ला अदालतले पूर्वडिआइजी छविलाल जोशीलाई ५० लाख धरौटीमा छाड्न आदेश दिएको छ ।

अदालतका श्रेस्तेदार तीर्थराज भट्टराईले काठमाडौँ जिल्ला अदालतको आजको आदेशअनुसार जोशी ५० लाख बैंक ग्यारेन्टी बुझाएर साँझ नै रिहा भएका जानकारी दिनुभयो ।
यसअघि जोशीमाथि कास्की जिल्ला अदालतले सहकारी ठगी, संगठित अपराध र सम्पत्ति शुद्धीकरण मुद्दामा ८८ लाख धरौटीमा छाड्न आदेश गरेको थियो । त्यहाँ जोशी बैंक ग्यारेन्टी बुझाएर रिहा भएका थिए ।
सोही प्रकरणमा रास्वपाका सभापति रवि लामिछाने कास्की अदालतबाट ६५ लाख र काठमाडौँ जिल्ला अदालतबाट ६० लाख बैंक ग्यारेन्टी बुझाएर छुटिसक्नुभएको छ ।
उनीहरुविरुद्ध अझै रुपन्देही, चितवन र पर्सामा पनि सहरकारी ठगी कसुरमा जाहेरी दर्ता भएको छ । रुपन्देहीमा मुद्दा दता भएको छ ।
चितवनमा प्रहरीले प्रतिवेदन सरकारी वकिललार्इ बुझाइसकेको छ भने पर्साले अनुसन्धान गरिरहेको छ ।
उता पोखरामा ६५ लाख बुझाए धरौटीमा छुटेका रविलामिछाने लगायत अन्य आरोपी विरुद्ध उच्च अदालत पोखरामा पुनरावेदन परेको छ ।



उनलाई थुनामै राख्नुपर्ने माग गर्दै उच्च सरकारी वकिल कार्यालय पोखराले निवेदन दिएको हो ।