काठमाडौँ, ७ माघ : प्रहरी प्रधान कार्यालयले चितवनमा प्रहरीले एक युवकलाई कुटपिट गरेको घटनामा संलग्नलाई कारबाही थालिसिकएको जानकारी गराएको छ ।
नेपाल प्रहरीका केन्द्रीय प्रवक्ता प्रहरी नायब महानिरीक्षक दिनेशकुमार आचार्यले चितवनको भरतपुर भरतपुर महानगरपालिका ११ बसेनी चोकमा गस्ती गर्ने क्रममा एक युवकलाई प्रहरीले कुटपिट गरिरहेको भिडियो सामाजिक सञ्जालमा सार्वजनिक भएको सन्दर्भमा नेपाल प्रहरी प्रधान कार्यालयको गम्भीर ध्यानाकर्षण भएको र संलग्नलाई आवश्यक कारबाहीका लागि निर्देशन भइसकेको जानकारी दिनुभयो ।
प्रहरी प्रधान कार्यालयले पदीय मर्यादा र आचरण विपरीतका क्रियाकलाप गर्ने प्रहरी कर्मचारीलाई कारबाहीको दायरामा ल्याउने नेपाल प्रहरीको नीति अनुरुप घटनाको सत्य–तथ्य जाँचबुझ गर्ने प्रयोजनार्थ आजै जिल्ला प्रहरी कार्यालय, चितवनले छानबिन समिति गठन गरी घटनामा संलग्न प्रहरी कर्मचारी उपर विभागीय कारबाही प्रक्रिया अगाडि बढाइसकेको जानकारी गराएको छ ।
चितवन प्रहरीले अस्थायी प्रहरी विट गणेशधामका प्रहरी सहायक निरिक्षक बुद्धिबहादुर घर्ती भुजेलले उक्त घटना घटाएको देखिएको र उनलाई निलम्बन गरी कारबाही थालिएको जानकारी गराएको छ ।
चितवनका प्रहरी नायब उपरीक्षक ज्ञानकुमार महत्तोले उनलाई निलम्बन गरी आजैबाट अनुसन्धान थालिसकेको जानकारी दिनुभयो । चितवन प्रहरीले उक्त घटनाको अनुसन्धान गर्न महतोकै संयोजकत्वमा ५ सदस्यीय छानबिन समिति समेत गठन गरेको छ ।
सामाजिक सञ्जालमा सार्वजनिक भिडियोमा ती प्रहरीले एक युवकलाई लेखेटेर लडेपछि बुटै बुटले हानेको देख्न सकिन्छ । घटना केही हप्ता अघि भएको बताइएको छ ।
