काठमाडौँ : पश्चिमी न्युन चापीय प्रणालीका कारण आज काठमाडौँ उपत्यकासहित देशभर मौसममा बदली आएको छ ।
बदली भए पनि यो कमजोर प्राणाली विकसित भएकाले पश्चिम क्षेत्रका केही ठाउँमा छिटफुट वर्षा हुने तर ठूलो पानी भने नपार्ने जल तथा मौसम विज्ञान विभाग, मौसम पूर्वानुमान महाशाखाले जनाएको छ ।
विगतमा पनि यसैगरी प्रणाली विकास भएको तर पानी पार्ने खालको भने भएको थिएन । आजको प्रणाली पनि त्यसैको निरन्तरता भएको मौसमविद्ले जनाएका छन् ।
माहशाखाकी वरिष्ठ मौसमविद् प्रतिभा मानन्धरले भन्नुभयो, “पश्चिम क्षेत्रमा हल्का वर्षाको सम्भावना छ, छिटफुट खालको । आज देभैभर धुम्म बादल लागिरहेको छ, काठमाडौँमा पनि त्यही अवस्था हो, सुुदूरपश्चिम, कर्णालीमा छिटफूट वर्षा हुनसक्ने भए पनि कमजोर प्राणााली हो ।”
उहाँले यो हिउँदमा विभिन्न सिष्टम आए पनि वर्षा गराउने प्रणाली भने नआएको बताउनुभयो । विगतमा वर्षा कम गराउने आँकलन अनुसार नै यसपाली वर्षा कम भएको जानकारी दिँदै उहाँले अझै पनि सुक्खा बढाउने जानकारी दिँदै वर्षा गराउने प्रणाली भने कमजोर नै रहेको देखिएको बताउनुभयो ।
मौसम बदली भएसँगै आज पुन चिसो महसुस भएको छ । यद्यपि उपत्यकामा विहान बेलुका चिसो कायमै छ । हिउँदको बीचमा एक पटक तापक्रम ह्वात्तै बढेको र फेरि घटेको थियो । यो वर्ष यसरी तापक्रममा निक्कै घटबढ समेत भएको थियो ।
अझै एक हप्ता हालको जस्तै तापक्रम रहने र अर्काे हप्तापछि भने विस्तारै तापक्रम बढ्दै जाने पनि उहाँले बताउनुभयो ।
जाडोयाम लागेपछि नेपालमा राम्ररी पानी पर्न सकेको छैन । जसका कारण विभिन्न क्षेत्रका बालिनालीमा समेत असर गरेको छ ।
