काठमाडौँ, २१ फागुन : नेपाल प्रहरीको मानब बेचबिखन अनुसन्धान ब्यूरोले अमेरिकामा कागजातबिहीन भएपछि फर्काइएका (डिपोर्ट भएका) ९ जनालाई आवस्यक सोधपुछ र जानकारी लिएर परिवारको जिम्मा लगाएको छ ।
ब्यूरोका प्रहरी उपरीक्षक नरेन्द्र कुँवरले मानबबेचविखनमा परेर उनीहरु अमेरिका पुगेका हुन् या अन्य कारणहरु छन् सबै विषयमा जानकारी लिएर परिवारको जिम्मामा पठाइएको जानकारी दिनुभयो ।
प्रहरीका अनुसार पीडितका रुपमा बेचिएर अमेरिका पुगेको भए त्यसरी पठाउने व्यक्तिमाथि बेचखिनमा मुद्दा चलाउनुपर्ने भएकाले ब्यूरोमा ल्याएर सोधपुछ गरिएको उहाँले बताउनुभयो । आवश्यक पर्दा पुन बोलाएर अनुसन्धान समेत गर्ने प्रहरीले जनाएको छ ।
आज अमेरिकाले चार्टर विमानमार्फत ८ जना र एक जनालाई व्यवसायिक उडानबाट ९ जना नेपालीलाई नेपाल फर्काएको थियो ।
अमेरिकी अधिकारीहरुले उनीहरुलाई अध्यागमन विभागको जिम्मा लगाएको थियो । त्यसपछि आजै अध्यागमन विभागले प्रहरीको मानब बेचबिखन ब्यूरोमा पठाएको हो ।
उनीहरु आजै काठमाडौँ आइपुगेका थिए । उनीहरुमध्य ८ जनालाई हात बाँधेरै काठमाडौँ ल्याइएको पीडितहरुले बताएका छन् । काठमाडौँ विमानस्थल आएपछि मात्रै खोलिएको थियो ।
